மௌனங்கள் பதனிடப்படும்
உன் இருட்டறையில்
என் முகத்துக்கு
என்ன பெயரிட்டிருக்கிறாய்?
இருட்டுப் போலவே
உன் மௌனமும்
நீ எங்கே இருக்கிறாய்?
இருட்டறையுள்ளே நீ
உன்னுள்ளே
ஓர் இருட்டறை
மௌனத்தின் மூலவேர்
உன்னுள்ளிருக்கும்
இருட்டறையின் உள்.
உன் மௌனத்திற்கு
வேர் இருக்குமாயின்
கிளையும் இருக்கும்
உன் மௌனக்கிளையில்
என்னைப்போலவே
ஒரு தனிக்குயில்
அமர்ந்திருக்கிறது.
குயில் இருப்பதை உறுதி செய்ய
அது கூவ வேண்டும்
நீ எப்போ
உன் மௌனத்தை உடைக்கிறாய்?
உன் மௌனம்
என் மீது அதிர்கிறது
நம் அதிர்வுகளின் மீது
சேறள்ளி வீசுகிறது
சமூகம் என்று தம்மை விளிக்கும்
“கூட்டம்”.

29.08.2006